ގދ.ތިނަދޫ މަގުހެދުމުގެ ފޭސް 2 ފެށުމަށްޓަކައި ޕްރީ ކާސްޓިންގ ގެ މަސައްކަތް ފަށާފައިވާ ކަމަށް ރޯޑް ޑިވެލޮޕްމަންޓް ކޯޕަރޭޝަން (އާރު.ޑީ.ސީ) އިން ވިދާޅުވެއްޖެއެވެ.
މިޕްރޮޖެކްޓުގެ ދަށުން ތިނަދޫގެ 14 މަގެއް ތަރައްޤީ ކުރެވިގެންދާނެއެވެ. މި މަޝްރޫއުގައި ޖުމުލަ 6.5 ކިލޯމީޓަރުގެ މަގު ތަރައްޤީކުރުމަށް ވަނީ ނިންމާފައިއެވެ.
ހުވަދޫ ނިއުސްއަށް މައުލޫމާތު ދެއްވަމުން އާރު.ޑީ.ސީގެ މީޑިޔާ އޮފިސަރ ވިދަޅުވީ ޕްރީކާސްޓިންގ މަސައްކަތް ނިމުމުން މަގުހެދުމުގައި މަގުތަކުގައި ކުރަން ޖެހޭ މަސައްކަތް ފަށާނެ ކަމަށާއި މަގުތައް ހަދާ ނިމޭއިރު މިހާރު ދިމާވާ މައްސަލަތައް ހައްލު ކުރެވިގެންދާނެ ކަމަށެވެ. އެގޮތުން ވިއްސާރަ މޫސުމުގައި މަގުތަކުގައި ފެންބޮޑުވުމާއި ނަރުދމާ ނިޒާމުގެ މައްސަލައަށް ހައްލު ލިބިގެންދާނެ ކަމަށް އެކުންފުނިން ވަނީ ވިދާޅުވެފައެވެ.
މީގެ އިތުރުން ތިނަދޫގެ މަގުހެދުމުގެ ފޭސް 2 ނިމޭއިރު މަގުތައް އިތުރަށް ފުރިހަމަވެފައި ރީތި ވެގެންދާނެ ކަމަށް މައުލޫމާތުދިނެވެ.
ގދ.ތެނަދޫ މަގެ ހެދުމުގެ ފޭސް 2ގެ މަސައްކަތަން ބޭނުންވެނެ ޕުރީކާސްޓުގެ މަސައްކަތެ އަދެ ވެންނޫ ފޮއްޓީގޮހޯ.#ޓީމްއާރުޑީސީ pic.twitter.com/UumIamPIgf
— Road Development Corporation Ltd (@rdcmaldives) November 24, 2021
މިއީ 78 މިލިޔަން ރުފިޔާ ސަރުކާރުން ޚަރަދުކޮށްގެން 2021 ވަނަ އަހަރު އޭޕްރީލް މަހު އާރު.ޑީ.ސީ އާ ހަވާލުކޮށްފައިވާ ޕްރޮޖެކްޓެކެވެ.
