ޚަބަރު
ކޮވިޑް ބަލީގައި މިއަދު ދެވަނަ މީހަކު މަރުވެއްޖެ

ކޮވިޑް-19 ބަލީގައި ރާއްޖެއިން، މިއަދު ދެވަނަ މީހަކު މަރުވެއްޖެއެވެ.

ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ބުނީ، ހއ.ތުރާކުނުން އުމުރުން 92 އަހަރުގެ ދިވެހި ފިރިހެނެއް މިއަދު ހެނދުނު 7:10 ހާއިރު މަރުވެފައިވާ ކަމަށެވެ.

މިއާއެކު ރާއްޖެއިން މިބަލީގައި މަރުވި މީހުންގެ އަދަދު ވަނީ 253 އަށް އަރާފައެވެ.

ފާއިތުވި ހަފްތާތެރޭ ކޮވިޑް ބަލީގައި ތިން މީހަކު ވަނީ މަރުވެފައެވެ.

ރާއްޖެއިން މިހާތަނަށް ކޮވިޑް-19 އަށް ޕޮޒިޓިވްވި ކަމަށް ރެކޯޑު ކުރެވުނު މީހުންގެ ޖުމްލަ އަދަދުވަނީ 91،993 އަށް އަރާފައެވެ.

އެޗްޕީއޭގެ ތަފާސްހިސާބުތައް ދައްކާގޮތުން އެކްޓިވް ކޭސަސްގެ އަދަދު މިހާރުވަނީ 1،726 ގައެވެ. އަދި، މީގެތެރެއިން 17 މީހަކަށް ހޮސްޕިޓަލްތަކުގައި އެޑްމިޓްކޮށްގެން ދަނީ ފަރުވާދެމުންނެވެ.

Comment